نصائح صالحة لأي شعبة لطالب جديد

هاد النصائح صالحة لأي شعبة غير هو فهاد المقال غانتطرقوا لبعض النقط فالشعبة الإنجليزية. لي قدر يكمل هاد المقال كامل يعرف/تعرف راسو/راسها ضمن(تي) التوفق .كانقدم لكم 10 ديال النصائح قيمة لي خص كل طالب جديد فالدراسات الإنجليزية يعرفها !
نتا/ نتي معلم(ة) 👏 ! حيثاش باش تطل فهاد البوسط يعني راك يا إما ناوي دير(ي) هاد الشعبة ولا درتيها. هنيئا ليك👌 حيث وصلتي لهاد المرحلة. حنا عارفين بلي الرحلة لهاد الشعبة تقدر تبانلك بلي كانت صعيبة (و تقدر فعلا تكون دازت عندك صعيبة) ولكن جمع(ي) راسك وحل(ي) (عيقت بهاد الـمؤنث) ودنيك مزيان (أو عينك فهاد الحالة). كاين بزاف ديال الأنواع ديال الطلبة ولكن 3 لي كيشدو الإنتباه. الاول هو الطالب "العادي" لي خصوا يفاليدي (هاد الكلمة كاينة فالإنجليزية وهادشي علاش ستعملناها) والتحدي لي فنظر هاد النوع هو "نحاول ندخل كلشي". النوع الثاني (الترتيب معندوش أهمية) لي هو الطالب لي كي "يحاول يجي فالحصص كاملين" (وما كيجيش فيهم كاملين ولا كاع) و التحدي ديالو هو "الحصة". النوع الثالث و لي نبغيوك تكون نتا/نتي منو 😤 هو الطالب لي كيتحارب باش يجيب "نقطة مزيانة" وماشي غير يدخل والسلام. فهاد الـ10 ديال النصائح حنا كانهضروا معاك نتا ! ماشي مع مقاتل مع الحصة ولا مع "ندخل كلشي". فالأصل، هاد المقال غايوريك كيفاش تكون من الفئة الثالثة و تحاول تهرب من الجوج لوخرين:
1- موجد ؟ وايه واش موجد ؟ عندك يجيبلك الله بلي غتقرا الدروس بالتفاصيل و إذا مافهمتيش غادي تسول الأستاذ فوقاش مابغيتي... راك غالط لاكنتي تفكر هادشي كاين. كل حصة فيها 2 ساعات ولكن بزززاف ديال الأساتذة ماتيكملوش حتى ساعة و نص. والفترة ديال القراية ماشي طويلة فأغلب الجامعات (مولاي إسماعيل، مكناس مثلا) غاتقرا(ي) شهرين/3 أشهر نقريبا أي واحد (more or less) 10 ديال الحصص هادشي إذا ماحسبناش الغيابات ديال الأساتذة (ماشي كلشي). هادشي علاش خصك تبدا من دبا ! كطالب سنة اولي، دورة أولى (S1) كانصحوك توجد قواعد اللغة (Grammar 1) التالية : Parts Of Speech (فحال الإعراب ديال العربية) Tenses (من لول تال لخر و أصلا من المفترفض خصك تكون فاهمهم فهاد المرحلة). هادشي غاتلقاه فالإنترنيت كامل مكمول وحنا أيضا غادي نبداو نديروا الدروس الجامعية منين نكملوا من الدروس ديال الثانوية (عام/عامين). كذلك فهم Punctuation فاللغة الإنجليزية و عرف فوقاش خص نخدموا النقطة والفاصلة الخ...
2- ماتفهمش الحرية غالط(ة) : الحرية... شعور زوين منين كاتولي تمشي الجامعة وتحس براسك كبرتي و مابقاتش عليك واحد النوع دالرقابة... بسباب هاد الشعور كيمشي فيها بزاف ديال الطلبة الجدد. كاين لي كيبقا 5 سنين وزيادة وهو/هي معشش(ة) فالكلية حتى كاتطلق الخز. وكاين لي تيبانلو لبنات وكيتطلق ولي كاتبانلها لولاد و كاتصدق حاملة. (قرا(ي) النصيحة 11 منين تكمل) هادشي علاش عرف تلجم نفسك (تحكم فنفسك) حيث هاد المرحلة من الحياة مغرية بزاف ولكن داك الإغراء يقدر يدمر الإنسان ماشي فحال المرحلة ديال الثانوية. كبح النزوات وماتنساش الهدف ديالك.
3- حس بالوقت: هادي قاصحة... الوقت ! منين كادخل الكلية وخصوصا الدراسات الإنجليزية عندك وقت خاوي بزاااف... داك الوقت كذلك كيساهم فالإغراء لي هضرنا عليه داكشي لاش كانصحوك تتعلم تلعب بالوقت. يا إما غادي تقرا صباح يا إما عشية. قسم الوقت على حسب كل دورة. الخطأ الكبييير لي كيترتاكب هو تمشي دير الوقت فعقلك (من لخر مغاديش طفروا). غادي تشري نوت بوك ديال الوقت (أي نوت بوك صغير) ودير فيه الإستعمال ديال الدورة و من بعد غادي تبقا دير إستعمال يومي ديال كل نهار. صوبوا قبل ماتمشي تنعس فكل ليلة ويكون فيه التفاصيل كاملة ويقدر يتخربقلك اليومين لولا حيث غادي تعطي وقت كافي بزاف أو مكافيش لكل مهمة. غير هو من بعد دير وقت مناسب لكل حاجة بالتفاصيل (نفيق مع 7، نخدم Spoken English مع 11 و 20 دقيقة، مثلا).
4- معامن غادي تكلس(ي) و فين ؟ لا راه مهم بزاف ! هاد النقطة كلشي تقريبا تيهملها. ولكن فالحقيقة السلوك ديال لي ضايرين بيك وفين كاتكلس مهمة كثر مما كاتصور. نهار منين غادي دخل للجامعة غادي تلاحظ بلي كاين لي كيشوف البلايص خاوين لقدام وتيمشي لور حيث هادي "الكلية" و "راحنا ماشي مزالين فالثانوي". هاو هوما النوع الأول وشوية من الثاني ولي كيشكلوا الأغلبية الساحقة ديال الطلبة. أسيدي/أ لالة شد ديـــــــــــمــــــان الصفوف الأولى حيث عندها تأثير كبير على المعلومات لي كتاخد. حدامن خصك تكلس ؟ كلس حدا داك الولد/البنت لي قالو عليه(ا) معقد(ة) و هادشي إذا طبعا كان داك الشخص من النوع الثالث. ماتفهموش غلط! هذا ماشي إستغلال،لا. هاد السيد(ة) غاديرو صاحبك(تك) علاش زعما؟ حيث أي واحد عندو طموح جدي وكاتشوفو كيكافح/كاتكافح باش تبقا مع النوع الثالث (لي باغيين يجيبو امتياز) خص يكون friend ولا best friend ولا شنو مابانلك حيث هاد النوع هو نفسوا نتا (كون نتا/نتي باغي/باغا تكون من النوع الثاني ولا الأول هاد المقال ماشي ديالك). هاد لي غادي تكلس حداه كاين فرصة كبيرة غادي دوز معاه 3 سنين together و تقدر تخرجوا مع بعضياتكم (سواء فرد أو مجموعة). إذن عزل الشخص لي غادي يكلس حداك حيث غادي يأثر عليك. نقطة اخرى هي المنافسة ! أيه كاين منافسة وخصها تكون فالكلية. حاول دير منافس سواء لي كاتشوفو لول فالمجموعة أو الجامعة و إذا كنتي نتا/نتي هو لول(ة) فخصك ماتنساش بلي موراك شي حد لي يقدر يخطف منك اللقب.
5- دير علاقات... صداقة 3: . سير للغروبات اخرين فالكلية وحاول تبني علاقات مع طلبة اخرين و يفضل يكونو فالعام الثاني وحتى اللخر (Your Senpei) حيثاش غادي يزودوك بمعلومات لي نتا/نتي معارفهاش على الأستاذ و على الإمتحانات. واخا تكون/كوني حشومي(ة) لقى طريق باش تجيب المعلومة بأي طريقة (شريفة).
6- قرا: ماعزيزش عليا نشد كتاب ولا كانمل... مادخلش للجامعة من الأصل ماشي لاعاد دير الإنجليزية. مجددا ماتفهومناش غالط... عارفين بلي كاين هادشي فالإنسان ولكن غير حيث "مامولفش" أو باش نجيوكم من لخر "معمرك شديتي كتاب فيدك و واخا شديتيه قريتي داك العجب ديال الروايات الفرنسية السنة الأولى بكالوريا ومليتي" ماشي مشكل ! ولكن دبا مرحلة جديدة لي لابد تولي تنعس مع الكتب و تولي تحب الكتب واخا تكون كاره هم حياتك كاملة. حنا كانقولولك "عطيهم فرصة اخرى" أييه عطي الكتب فرصة اخرى حيث هاد المرة غادي تشد كتاب بالإنجليزية وبغيناك تقرا شي حاجة من الدوق لي كيعجبك نتا/نتي ماشي لي فرضوا عليك الأستاذ. علاش ماتقراش شي كتاب لي تصوب منو فيلم ؟ خد شي فيلم ديال هوليوود لي كيعجبك وشوف الكتاب ديالو و قراه (راه التفاصيل ديال الفصة مختلفة غير مايجيبلكش الله غادي تمل). ولكن إذا كنتي مكاتعرفش تقرا الروايات ؟ بدا بالقصص القصيرة (فهاد الصيف طبعا) ولا قصص الأطفال وجمع بعدا واحد الفوكاب أساسي Essential Vocabulary و من بعد بدا تضرب القاصح شوية بشوية.
7- خصك تفهم القلم ديالك: هاه ؟ فحال شكل ديال القراءة ... خصك تكتب ولابد! الإمتحانات كلها مبنية على القدرة ديالك فالكتابة. عرفتي كيفاش تكتب مرحبا ! ماعرفتيش و وخا تكون عندك معلومات (مفاهمش كيفاش تحطهوم) ماتفكرش تكون من النوع الثالث. غاتبقا تحارب حياتك الجامعية كاملة غير باش يلاه يلاه تبقا فالفئة الثانية و إذا طلعك دع غاتولي مع صحاب "واش ندخل ولا لا". لابد تكتب. نعاودوا لابــــد تـــكـــتــب. دير ليبغيتي ! عزل البان Pen "القلم" لي كاتراح فيهن عزل الكلسة ولا الطريقة باش تكتب و لا استحضر الأرواح أثناء الكتابة... المهم خاصك تكتب. قابلنا طلبة بزاف لي عندهم التفاصيل الدقيقة على شي كتاب و رغم ذلك حتى شي معلومة ماتيقروا يحطوها فالورقة، علاش ؟ حيث ماكيعرفوش يكتبوا ! إقرأ مقالات و كتب وفنفس الوقت لاحظ كيفاش كاتكتب الجمل وكيفاش كانربطوا فكرة بفكرة. عزل شي ستايل ديالك لي حاول طوروا (Develop your style of writing). و إذا كانت عندك شي ماضي مظلم مع الكتابة ولا بكل البساطة مكاتقدرش تشد البان حيت كاتحس بواحد الشعور لي ماكيتفسرش ولكن لي ماكيخليكش تكتب... هداك الله ينجيكم واحد المرض سميتوا "مافيا لي يكتب". حارب هاد المرض حيت غادي يدمرك كيفما دمر دوك لي كالسين 5 سنين وأكثر فالجامعة حتى كيوليوا حافضين شمن أستاذ كيبغي نص نص و شمن واحد لي عندو بنتو فألمانيا كاتلبس 45 فرجليها ... أطول نقطة هضرنا عليها هي هادي ... علاش ؟ حيث خـــــصــك تــــكـــتـــب !
8- وجد للإمتحان على بكري: واخا نديروا حملة فيسبوكية قليل لي غادي يعرف الأهمية وغادي فعلا يتبع هاد النقطة. سول راسك بكل صراحة فين معمرك وجدتي على بكري ؟ كاتبقا هضرة و السلام... إوا خصك نعام أس/ الالة توجد قبل بـعلى الأقل شهر ونصف. We hate to break it to you but here are the facts ... أصلا غاتقرا شهراين حتال 3 ديال الأشهر ولكن غير تقرا ديك 25 يوم لولة Ring the bell "دق الناقوس" وبدا توجد حيث ديك الفهامة ديال "أنا واعر(ة) تال اخر سيمانة عاد كانوجد مصالحاش للفئة الثالثة" تقدر تصدقلك المرة لولة ولكن غير غادي تستحلى لديك التوجاد المزروب حتى غادي تصدم فشي دورة وغادي طيحلك النفسية. هادشي علاش وجد كيف دوز 25 يوم من القراية وبدا من أول درس فكل مادة وبقى غادي(ة) حتى توصل على شنو قريتو اخر حصص ديك ساعة سير قد قد مع الأساتذ(ة) أذا قدرتي و منين تكمل القراية ويعطيوك ديك 15 يوم ولا 20 ديال التوجاد عاود من لول المراجعة.
9- سايكولوجي ديال الأساتذة: إذا ضبطي هاد النقطة عندك النص ديال النقطة أو أكثر مضمونة 100 % . وهادشي علاش هضرنا على النقطة 5. باش نفسروا الأمور بسهولة "عرف القوالب ديال كل أستاذ" كل استاذ(ة) عندو(ها) واحد الـ pattern يعني واحط النمط ديال التعليم وحتى الأختبار. أصعب الاساتذة هوما لي مايمكنش تقرا الـPatterns ديالهم حيت هوما فاهمين هاد النقطة ولكن دوك الأساتذة شبه منعدمين فالمغرب (ولا منعدمين) وخودوها منا For Granted (بلا ماتفكر فالصحة ديالها، غير ثيق فهاد المسألة) حيت الأساتذة براسهم تيوريوك أشنو يقدر يديرو أثناء الشرح... كاين لي كيتعمد هاد القضية وكاين لي ماكيحسش بيها. ستاغل هاد "الثغرة" وخا هي أمر عادي و فهم الأساتذة شنو تيبغوا.
10- بحث ثم بحث ثم بحث: منين كاتحط رجلك فالكلية كايتعطالك واحد اللقب "طالب(ة)" هاد اللقب لي هاز(ة) معاك فالجوف ديالو بزاف ديال الحوايج من أهمها "البحث". تعلم تقلب على المعلومة وتجيبها فينما كانت مطمورة. فلايف لي درنا كنا قلنا بلي أغلبية ديال المعلومات لي غاتكتاسبها خصك تجيبها من عندك "أنترنيت/كتب" وماشي من الأستاذ حيث ديمان الأستاذ عندو واحد النزعة أنه تيخلي واحد الجزء من الدرس مفقود وخلاص كاين لي كيخلي الدرس كامل مفقود ...الأول تيكون يا إما فقط هاديك طريقتو و يا إما عارف الواجب ديالو و فوق من داكشي تيبغي الطلبة و تيبغي أنهم يستاحقوا داك اللقب. هادشي علاش ديمان كيخلي واحد لـ Puzzle. نتا ولا نتي خصك تعلم فن البحث. نقطة اخرى هي أنك (وقليل لي كيديرها) تحضر مع Groups لوخرين و تدخل أساتذة ماشي دياولك وبهاد الطريقة كاتكون كاتجمع كل Pieces of the puzzle.
11- هادي هدية زايدة: العلاقات ! نتوجهوا لولاد وندوزوا لبنات. لولاد نبغيوا نبشروكم بلي كاين واحد النوع ديالك البنات (ماشي طالبات) لي غادي يبانولك من 30 يوم قبل الإمتحان وكاتولي نتا 'زوين'. بعد منهم سيريوسلي! إذا بانولك من لخر semester لـلخر semster عرف بلي راك نجحتي فبزاف ديال النقط يعني تقدر تقول هذا indicator تستغلوا (أه ستغلوا) باش تعرف بلي راك درتي مجهود و "بانتي قراي". ايتها القتاة ... حيد شعرك من فوق ودنك وسمع (حل عينك زعما) حنا خايفين عليك خصوصا من ديك النقطة 2. الحرية غاتلعب بيك نتي كتر من الولد وهادشي لاش خصك تربي واحد القدرة ديال ضبط النفس كثر من لي كانت عندك فـالثانوية. دبا بجوجكم ولد وبنت ... حنا ماقلناش لا "ماتصاحبوش" حيت وخا نقولوها مغاديش تسمعونا (بزاف لي مغاديش يسمعونا) هادشي علاش حنا فالحقيقة كانشجعوا على أنك تلقاو داك رفيق الدرب غير هو إينا واحد؟ راه ماشي داك لي كيضرب guitar و كل يوم لبسة و تيكلس لور حيث هو عندو "عقلية مختالفة" وماشي ديك لي مرة مرة كاترمي كلمة ولا جوج بالإنجليزية وكادخل حتى شوية ديال الفرنسية والهدف ديالها (إذا سولتيها) "نشد الإجازة و المهم ندير شي تخربيقة من بعد ولا نكلس فدارنا" وهي Satisfied أنها تبقا مع الفئة الثانية ولا الفئة الأولى... ضرب عليها وخا تكون الحور العين شخصيا. ونفس القضية ليك البنت... إذن النصيحة لقى/لقاي your partner من الفئة الثالثة وهاديك الهضرة ديال "لا غير يكون/تكون ضريف/ضريفة و بنت/ولد الناس" مصالحاش حيث لي فعلا ولد/بنت الناس غايتقاتل باش يدخل مع النوع الثالث...
إذا وصلتي لهنا دبا و كاتقرا(ي) هاد السطر وكملتي المقال كامل فهنيئا لك مجددا 👏👏حيت صبرتي ولكن ستافدتي 11 نصيحة لي إذا تبعتيها غاتوصلك للمراتب الأولى بدون شك. ماشغلكش المجهود لي درنا باش نصوبوا المقال من القلب إلى القلب بدون نفاق ولا إحتكار... لي نبغيوا نعرفوا هو منين تكمل semester تجي تقول لينا بلي راك من الفئة الثالثة و تحكي لينا قصتك وتعطينا النقطة ديالك باش فعلا نشاركوا الفرحة معاك.
ملاحظة: أي أسئلة على الإنجليزية ماتحشموش.
المقال منقول و معدل من: https://www.facebook.com/EasyGlish

قصص نجاح : صناعة المجوهرات

 

 

اسعد الله مساءكم بكل خير يا اصحاب العقول المبدعة .

و انا طفل 7 سنين توفي مصدر قوت عيشنا . مات ابي لم اذق طعم الابوة . كيف لك ان تحيا حياة كلها مشاكل هموم افكار مبعثرة . لا باس . اكملت دراستي ف الابتدائي و الاعدادي . لكن في الثانوي حكاية اخرى ستسرد للاحفاد في المستقبل البعيد الجهول . لا اطل عليكم .ميولي في الدراسة كانت تميل الى العلوم . كلي امل ان اصبح شيئ ليس شيئ بل قمية لها وزن عند شباب صاعد يزحف باصابع يديه و رجليه ليصل الى مبتغاه المنشود . في بداية السنة و بالتحديد في اولى باك علوم تجريبة اسودت علي الدنيا مشاكل عائلية بسببها خرجت من الدراسة . كيف ذالك . نحن في قرى ف جبال الاطلس الصغير لا تكتمل حياتنا في الدراسة شائت الاقدار ان انقطع من الدراسة و اعمل في صناعة المجوهرات شهر كامل انقطعت عن الدراسة لا لا ليس شهر بل الف عام من العزلة وتأنيب الضمير . لمذا انا بالذات .... في صبح يوم الثلاثاء مشهد راصخ بين خلايا دماغي رغم بعض من هذه الخلايا قامت بما يسمى بالانتحار الخلوي لقساوة ذاك المشهد . نقاش حاد دار بيني و عائلتي .اخيرا ربما الله اراد ان تكتمل حياتي على ما اريده عدت الى الدراسة من جديد لكن قطعت وعدا اني ساحصل على الباك و سانتهي مجددا قلت لهم لا باس . حصلت على شهادة الباك بميزة مقبول . بعدها انتقلت الى اكادير اعمل صانعا للمجوهرات و طالب في كلية العلوم شعبة البيولوجيا . اليوم زالت كل الهموم زالت كل الضغوط ترى المستقبل مشرق و ترى الماضي مظلم منتهي .

قصص نجاح : مشروع منتوجات التجميل بالاركان

 

 

بعد تردد قررت نشاركم القصة ديالي ، الاسم ديالي يوسف من جنوب المغرب بالضبظ زاكورة كلنا كنعرفو الاوضاع الصعبة تما والفقر والتهميش ، لمهم عنيت من هاد الويلات كلها مي رغم دلك قررت اني ندير شي حاجة ونبدل الوضعية ، شديت الباك دوزت لفاك من بعد مكملتش ،لضروف لهيا كيعرفها كل واحد دوزلفاك ب لبورس ، شديت لبورس الاخيرة 1200 درهم بديت بها مشروع ل هوا منتوجات التجميل بالاركان ،تكرفصت وتبهدلت مي مفقدش الامل و بعد سنتين ستطعت اني نأسس شركة كتنافس كبريات الشركات لي خدامة فالمغرب و على برا ، المنتوجات ديالي ولاو فالاتحاد الاوربي وامريكا والخليج،كلشي هادشي بداب 1200 درهم ديال لبورس ، الفائدةمن هادشيكلو هو معمرك تفقد الامل خدم غدي توصل .

الناس باغين ينقصو الوزن ويطيحو الكرش

شفت بزاف د الناس باغين ينقصو الوزن ويطيحو الكرش ووحدين اخرين باغين يزيدو الوزن وقلت انكتب الجامع الصحيح فالفيتنيس باش بنادم يستافد .
الجسم ديالنا ايضا خدام بقواعد الثيرموديناميك يعني :
Calories in > calories out = زيادة في الوزن
Calories in < calories out = نقصان فالوزن
Calories in = calories out = ثبات في الوزن
هاد القواعد خدامة من غير لا كان عند الانسان شي اختلالات هرمونية و السؤال الآن هو كيفاش نحسب الاحتياجات ديال الجسم ديالي من الطاقة او بالأحرى شحال كيحرق الجسم ديالي من كالوري فالنهار .
قبل منقوليك كيفاش خاصك تعرف واحد جوج مصطلحات :
BMR = basic metabolic rate = عدد السعرات الحرارية لي كتحرقها يوميا ونتا ماكادير والو غي ناعس وحال فمك فالسقف يعني السعرات لي كتحرقها باش تنفس وباش دماغك خدم و الدورة الدموية وداكشي وكيختالف من شخص لآخر على
حسب السن الوزن الجنس ونسبة الدهون فالجسم
Tdee = total daily energy expenditure = BMR + acitivites بالعربية هي شحال الجسم ديالك كيحرق فالنهار بالأنشطة لي كدير ماشي و غي نتا ناعس وهادشي لي كنقلبو عليه
لابغيتي تنقص الوزن خود Tdee ونقص منو 500 سعرة حرارية وغادي تنقص 0.5 كيلوجرام فالأسبوع .
لا بغيتي تزيد الوزن خود Tdee وزيد عليه 500 سعرة
حرارية وغادي تزيد نصف كيلوجرام فالاسبوع .
باش تحسب Tdee كاينين مواقع لي كتعطيهوم المعلومات ديالك و طبيعة الأنشطة اليومية و كيعطيوك رقم وتيكون قريب من الدقة ( حسب التجربة ديالي ) .
لي كانستعمل هو هاذا :
https://tdeecalculator.net/
الآن بعدما كنعرفو شحال كنحرقو من سعرة حرارية فالنهار خاصنو نقادو النظام
الغدائي ديالنا و فالطبيعة كاينين 3 ديال Macronutrients ولي كيتسماو ل Macros لي هوما الكاربوهيدرات ، الدهون والبروتينات .واللي خاصك تعرف هو ان :
كل جرام من الكاربوهيدرات = 4 سعرات حرارية
كل جرام من البروتينات = 4 سعرات حرارية
كل جرام من الدهنيات = 9 سعرات حرارية
البروتينات بمثابة الياجور فالبناء ديال شي دار والقيمة ديالو خاصها تبقى ثابتة ولي هي من 1.5 تال 2 جرام من البروتينات لكل كيلوچرام من الوزن ديال الجسم .
الدهون مصدر طاقة جد مهم كما انه كيدخل فالتركيب ديال الهرمونات وبالتالي خاص دخلهم فالنظام الغدائي ديالك .
الكاربوهيدرات واللي هي المصدر المفضل للطاقة بالنسبة للجسم حيتاش كيتم التحويل ديالها لچليكوز و كيدوز للدم والسرعة ديال الهضم تيكون على حسب glycemic index ، فالكاربوهيدرات لي عندها GI طالع خاص الواحد يتجنبها حيتاش كطلع مستويات سكر فالدم بسرعة كبيرة من بعد كيجي واحد الهورمون سميتو الانسولين باش ينظم داك مستوى السكر و كيخزن الفائظ على شكل جليكوجين ولي كانت مخازن الجليكوجين عامرا فكيخزنها على شكل دهون .
مثلا شخص كيوزن 70 كيلوجرام و Tdee ديالو هي 2000 سعرة حرارية وباغي يطيح الوزن غادي يحتاج :
الهدف اليومي من السعرات الحرارية = 1500
بروتينات = 140 جرام *4 = 560 سعرة حرارية
يعني باقي خاص 940 سعرة حرارية و يمكن يقسمها كيفما بغا بين الدهنيات والكاربوهيدرات على حسب كيفاش الجسم ديالو كيستاجب لكل عنصر .
نقولو انه غادي يقسمهم بالتساوي يعني :
الدهون = 52 جرام *9= 470 كالوري
الكاربوهيدرات= 117جرام*4 = 470 كالوري
كنضن كولشي واضح دابا ولكن السؤال هنا كيفاش غنعرف شحال فكل غداء من جرام دالبروتين ، الكارب والدهون . غنقولك انسطالي واحد التطبيق سميتو MyFitnessPal كاين فالآيفون والأندرويد . غادي تشري ميزان صغير وغادي تبقى دخل اي حاجة كليتيها فالتطبيق و هو غادي يحسب ليك شحال وصلتي فال Macros وكذلك اجمالي السعرات الحرارية .
دابا شرحت الأساسيات فالتغدية وكاع لي خاص باش كل واحد يقاد النظام الغذائي ديالو غادي ندوزو للأهم .
لا كان كيصحابك اخي انه لا نقصتي الوزن غادي تحصل على الجسم لي كنتي كتخيل فراك غالط ، بدون تمارين التحمل او المقاومة ( resistance training) فراك غادي تكون نسخة مصغرة من نقطة البداية او بحيت كيكون الوزن ديالك طبيعي لكن نسبة الدهون مرتفعة حيتاش معندكش كتلة عضلية وهنا كيجي دور تمارين التحمل .
وكذلك بالنسبة للناس لي باغي تزيد فالوزن خاصهم يمارسو تمارين التحمل باش داك الوزن الزئاد يكون الأغلية ديالو كتلة عضلية ، حيتاش لا زدتي غي الدهون غادي يكون الجسم ديالك اسوء من الأول .
أهم النصائح لي غادي تنفعك لا قررتي تبدا :
لا كنتي يالاه بادي يعني عامك اللول نسا عليك دوك التمارين التقليدية ديال حصة د الصدر هادي د الرجلين هادي ديال البيسيبس وولي تخدم Full body workout بطريقة ديال 5x5 stronglifts يعني غاتاخد وزن لي تقد دير بيه خمسة ديال التكرارات و غادي تخدم بيه خمسة ديال السيريات وفكل حصة خاصك تزيد واحد جوج كيلو فكل تمرين. هاد النوع ديال التمرين غادي يخليك تهرب بقوة التحمل ديالك ، الجسم ديالنا ذكي وكيتأقلم مع كاع الظروف وغادي يدوز العام و غتلقى راسك هربتي على ناس سنوات هوما كيترينيو .
ركز على هاد تلاتة ديال التمارين :
Bench press
Deadlifts
Squats
حاول تستافد من Noob gains احسن استفادة حيتاش بنادم مني كيكون يالاه
بادي الاستجابة العضلية او protein synthesis واللي هي العملية ديال بناء العضلة كتكون آمارش
الصيام المتقطع ولا intermittents fasting لمدة لا تقل عن 16 ساعة من احسن الحوايج لي تقد دير سوا كتريني سوا لا حيتاش كيكون مستوى السكر فالدم ثابت وكيكون الإنتاج ديال واحد الهرمون سميتو (Gh : growth hormone ) واللي الدور ديالو هو بناء العضلة وكيحرق الدهون كذلك . متلا انا كنتناول. اخر وجبة مع 10 دالليل وماكاناكل حتال 2 د النهار حيتاش اصلا مكيكون فيا لي يفطر
تجنبو الكاربوهيدرات بعد التمرين حيتاش كطلع مستويات الانسولين وكتهبط مستويات Gh وبالتالي كيتوقف حرق الدهون وكذلك كتقل عملية الاستشفاء العضلي .
بالنسبة للبنات لي خايفين يخسرو المظهر الانتوي بحمل الاثقال فماتخافوش حيتاش الجسم ديالكم مكينتجش التيستوستيرون وبالعكس غادي تزيدو الأنوثة ديالكوم بال curves وداكشي 😍
تناولو الحمض الأميني اللوسين لي كيكون ف Bcaa حيتاش كنعتابرو الملك ديال التغدية حيتاش هو لي كيقول للجسم نوض بني شوية ديال العضلات او بالاحرى كيحفز ل protein synthesis لي دوينا عليا قبيلا . لا مابغيتيش تشري مكمل ال Bcaa فراه اللوسين كاين فالصفر ديال البيض بكمبية ممتازة .
حيدو السكر حيتاش هاد الموصيبة غادي يخليك ديما فيك الجوع . داير فحال المخدرات حيتاش مني كاتاكلو الدماغ ديالك كينتج السيروتونين ولي هو هرمون ديال السعادة فكتولي مدمن عليه وكيربطوه ببزاف د الامراض فحل السكري امراض القلب ، الإكتئاب ....وحاجة اخرى هي Sugar crash . مني كتاكلو كيطلعو مستويات السكر فالدم بسرعة وكينخافضو بسرعة بفضل الانسولين و داك الانخفاض كيخليك تحس بتعب شديد .
موهيم هادشي راه العصارة ديال سنتين ديال التجربة , ساعة ونص وانا كنكتب وهاد المعلومات غايبيعوهوم ليك اخصائيي التغدية ببزاف د الفلوس و ولي عندو شي سؤال ولا بغا بالمصدر ديال شي معلومة قلتها مرحبا غا سيفط ميساج